استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ قازاقستان دجيۋ-دجيتسەرلەرىنىڭ كەزەكتەن تىس كونفەرەنتسياسىندا قاۋىمداستىقتىڭ جاڭا پرەزيدەنتى بولىپ سايلاندى, دەپ حابارلايدى باسقارمانىڭ ءباسپاسوز قىزمەتى.
بولات ماجاعۇلوۆ توكيوداعى ازيا چەمپيوناتىنىڭ قولا جۇلدەگەرى, برازيليالىق دجيۋ-دجيتسۋدەن كوك بەلبەۋدىڭ يەگەرى.
"قازاقستان رەسپۋبليكاسىنىڭ دجيۋ-دجيتسۋ قاۋىمداستىعى ەلىمىزدە اتالمىش سپورت ءتۇرىن دامىتۋ ماقساتىندا قۇرىلدى. قاۋىمداستىق قىزمەتى قازاقستاننىڭ ۇلتتىق كوميتەتىمەن تانىلىپ, قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتىمەن اككرەديتتەلگەن. سونىمەن قاتار قاۋىمداستىق حالىقارالىق دجيۋ-دجيتسۋ فەدەراتسياسىنىڭ (JJIF) مۇشەسى بولىپ تابىلادى", دەلىنگەن ءباسپاسوز حابارلاماسىندا.
قاۋىمداستىق قۇرامىنا قازاقستاننىڭ 16 وبلىسىنىڭ جانە استانا مەن الماتى قالالارىنىڭ فەدەراتسيالارى كىرەدى. قازىر سپورتشىلار جاكارتاداعى (يندونەزيا) ازيا ويىندارىنا دايىندىق ۇستىندە.